5 Views
  • Oleh Tgk. Samuti Sp. Mesra

ACEHGROUND.COM  |    BUDAYA

Assalamualaikum wahe rakan
Saleum lon layang rot hp tuha
Saleum bak ulon keu rakan-rakan
Inong ngon agam yang muda-muda

Na saboh haba seubagoe peusan
Keu gata rakan yang mantong muda
Gata bek laloe deungon bayangan
Wate saboh jam teulah teuh raya

Yoh mantong muda ta peugot program
Beujeut keu beukai wate ka tuha
Meunyo yoh muda hana ketrampilan
Hek that hai rakan ‘oh wate tuha

Tapi nyo gata na ketrampilan
Ngon nyan hai rakan jeut ta useuha
Usaha beuhaleue ta useuhakan
Yang ridha Tuhan geutanyoe mita

Dalam udep nyoe cok peulajaran
Bak ureung awai wahe syedara
Bak ureung tuha2 ta cok teuladan
Pakon jeut seunang gobnyan ‘oh tuha

Bila peureule ta tanyong rijang
Jeut keu pengalaman lam udep gata
Tanyong bak gobnyan peu keugiatan
Nibak saboh jan yoh wate muda

Peukeuh di gobnyan atra bawaan
Dari warisan bak ayah ngon ma
Beuthat pih jai that atra warisan
Nyo h’an jeut peutimang abeh ubena

Tanyoe h’an geuubah nasip le tuhan
Nyo tanyoe rakan ta ubah hana
Meunan geupeugah dalam Al Qur’an
Kon cit hai rakan lon peuna-peuna

Lheuh ta useuha meumacam ragam
Bak Allah rakan tanyoe meudo’a
Ta lake bak Po lheuh ta seumbahyang
Udep beuseunang akhirat donya

Oleh karna nyan bacut lon peusan
Tanyoe keu Tuhan bek sagai lupa
Ta pubuet suroh wahe e rakan
Yang larang Tuhan bek ta keureuja

Nibak jameun nyoe cukop that sayang
Le that godaan wahe syedara
Bak judi on-line kadang di sinan
Uroe ngon malam laloe lageina

Beuna ta teupeue nibak judi nyan
Bacut na meunang talo meukeuba
Ureung meujudi h’an tom na seunang
Sabe lam utang udep teuh papa

Ladom bak pinjol keudeh meuutang
Akibat jih nyan cukop bahaya
Nyo h’an ek bayeue lheuh ta meuutang
Ka meutamah jai ngon bungong riba

Tanyoe ji peumale ngon rakan-rakan
Oleh pinjol nyan bak saboh masa
Ladom na yang cre ngon Mak si Agam
Ngon wap pinjol nyan wahe syedara

Nyan keuh akibat mabok keu bayang
Seubab ji jok harapan le cina tuha
Oleh karena nyan ingat hai rakan
Ta peukong iman udep lam donya

Bek sagai ta deungo ajakan syetan
Karna syetan nyan musoh durjana
Jih ka geukutok le Allah yoh nyan
Geutanyoe rakan bek ek ji daya

Bukon le sayang cem pala subang
Di cong mamplam keunong geulawa
Meumada ‘ohnoe haba lon karang
Nyo hana reumbang meu’ah beuraya.

Sp. Mesra, 14 April 2025.

Artikel PEUSAN KEU ANEUK MUDA pertama kali tampil pada AcehGround.